Alaska遊記之 - 神的創造

登上郵輪時，覺得郵輪好大，好宏偉。

當郵輪駛進入雪山glacier範圍時，眼前的景象如巨人般站在面前，剎那間覺得大自然很浩大，郵輪根本算不得甚麼。

想起大自然背後的創造主，心中不禁驚嘆: 神啊! 你真偉大!

聖經明言，諸山未曾生出，地與世界未曾形成，從亙古到永遠，你是神。世人算甚麼? 你竟顧念他? 感謝創造主藉今次外遊再一次寶貴的提醒。

出埠了

明天我將會出埠外遊，為免讀者好奇點解 lapelay失蹤一星期又音訊全無，特此告之各位，大家就不會催我寫blog update近況，尤其是在香港的你們，哈哈! 說來也奇怪，我最近先發現原來本博客的讀者很少會於blog內的comment一欄leave message給我，通常睇完個blog就會直接用email或來電問候及鼓勵，這樣也好，多了一份personal touch和親切感。

去邊度外遊? 看圖識字啦! 目的地叫Alaska，乘搭的交通工具叫郵輪。待我回來再與大家分享所見所聞吧!

女人購物狂

自問從來不是非常熱衷購物，老公都讚我是應花則花的人，但今天，真的有點失控了...

怪只怪自從去年十月回港shopping完後一直沒有太大的購物慾，今次一shopping就一發不可收拾。早排忙得不可開交，難得今天天氣睛朗，借買別人生日禮物為名，實情是想往shopping mall逛逛，看看有甚麼新產品面世。

先一晚已跟老公備案，告知他今天我會好好"獎勵"自己。難得一個人逛，當然逐間store慢慢睇慢慢揀，不消兩小時已手拿幾袋戰利品，感覺勁爽呀! 此時電話響起，oh no...老公來電! 他不是正在開會嗎? 點向他交代呢? 雖然係用自己錢買，但始終有D唔好意思，支吾以對跟他說我正在推動溫哥華的經濟...幸好老公特赦，他不單止無怪責，還叫我繼續採購。但經他這麼一說，我還好意思繼續麼? 唯有收手吧!

回家慢慢欣賞戰利品時，發現其中一件包裝得非常精美，真的不捨得拆開它啊!

生日快樂 (II)

大少奶話個生日快樂message好似人地登報紙的祝賀語句 :)

想起早前香港有個富豪買了報紙頭版祝賀某女明星生日...

係囉係囉，我又唔係劉X雄，大少奶又唔係李X欣，我又唔係大少奶的The One，更加無龐大財力去買起Vancouver Sun or Province的頭版廣告，所以唯一可以做係用自己的blog其中一日做頭條。

難得大少奶收到此心意，再次祝大少奶福如東海、壽比南山、身體健康、龍馬精神、出入平安、大吉大利...

生日快樂

大少奶,

生日快樂!!!!

二少、二少奶賀

聚舊

早陣子與大學同學聚舊，輕輕鬆鬆的吃了一頓豐富的晚餐。感恩的是大家畢業後仍有保持聯絡，不時相約update彼此近況。後來大家開始拍拖結婚，於是又認識了她們的另一半，所以訂食飯時愈訂愈大張! 女仔吱吱喳喳傾偈時，班男仔亦不愁寂寞講波講打機打成一片。最感恩是有好幾位更已成為主內姊妹，有些甚至是同一教會，心裡實在感謝神過去多年的保守，願主繼續祝福這段寶貴的友誼。

委身

駕車經過一教會，門前燈箱寫上:

Once commit, don't quit.

工作如是，感情如是，信仰更是如是。

謝謝天父寶貴的提醒，教導我對事、對人、對神要認真、委身。

SaSa沙龍

同SaSa玩，會見到佢好多攪笑樣。

SaSa: 我用headphone聽緊Canucks

Sa叔: 聽乜鬼，你都無插落部收音機度!

Sa叔: 你睇下SaSa個肚腩仔幾大...

SaSa: 傷風抹下鼻水先!

SaSa: 嬸嬸，你做乜咁樣?
Sa嬸: 無計，鬼叫你唔望鏡頭!

SaSa: 我呢個pose得唔得?

SaSa: 想偷影我? 無咁易!

SaSa: 我睇緊電視，唔好嘈...

SaSa: 我要讀書!

SaSa: 點解我個頭要夾髮夾?

SaSa: 白裡透紅的皮膚，你地望塵莫及啦!

韓風 (II)

另一新產品我地試係呢款Soba麵，個湯底唔係湯粉包，係真係一盒frozen湯!

個麵非常好食，唔似有D Soba麵內D buckwheat有種粗糙感，個湯有濃濃的昆布味，正呀!

韓風

近排愛上食韓餐，成日出街食都唔係方法，於是想試下自己煮。聽講Coquitlam有間好大間的韓式超市，於是走去見職見職，順便買我至愛的韓式豆腐煲的湯底。

從未試過連續同幾個售貨員解釋自己想要乜但無一人明白，D售貨員個個只識聽好簡單的英文單字，雞同鴨講之下，用盡手語再加外援(call老公即時上網查拼音)，前後於超市內行成半個鐘，好不容易先找到想買的豆腐煲湯底。

老公亦有晚同我去Robson街另一韓式超市explore下，呢間同Coquitlam果間差一點，少D貨，D貨亦唔係全韓日，有Tropicana，有Wonder Bread，仲有李錦記。兩個唔識睇日文同韓文既人，靠睇圖片同想像力，結果掃了好多都唔知係乜東東的貨品，返屋企膽粗粗逐樣試煮，過程新奇剌激又攪笑，幾好玩。

呢樣貌似麵的東西，勁難煮得軟身，前後加水超過四次，湯麵變成糊狀，口感依舊chewy，味道其實不錯，有D似年糕質地，趙到牙都軟，無理由煮45mins都未熟卦? 我地conclusion係其實質地就係咁! 老公把一些留起作明天pack lunch，結果佢要落公司canteen買lunch，according to 老公的description係因為D left over 變了一舊混凝土!!!!! mic 極都mic 唔返軟身，用膠叉食，舊混凝土把膠叉也弄斷了...

司琴炒譜

說的不是酒樓的干炒牛河，也不是工作的鼓椒炒尤，而是事奉的司琴炒譜。

右手揭頁時錯手揭多了一頁，馬上揭回時左手彈錯了拍子，炒了半個小節。半個小節其實只有拍半，大概有半秒至一秒的時間，由於正在彈過門，炒得特別礙眼。過了那個小節，一切回復正常，但司琴的心不住的往下沉。作了司琴超過十年，今次竟犯了這種不該犯的錯誤，真抵打!

炒得雖然不是十分厲害，但司琴聽到了，指揮聽到了，神聽到了。

理智上雖然知道神仍會悅納是次的事奉，但司琴仍然悶悶不樂，感覺好像一個大學生連一加一也計錯一樣。求父叫司琴不要灰心，繼續努力用心事奉。

中日式甜品

今次試的是中式甜品沙翁，新鮮整好時非常香口鬆軟，本打算留起一些給父母品嘗，可是到了第二天時沙翁變得一團又濕又軟的"麵團"，爸媽食極都想像唔到係沙翁，真失敗呢! 甜品表妹話可能係沙翁上面的糖吸了空氣內的水份，因此變得濕軟。(佢果然係甜品專家!)


於是放棄中式，改攻日式，整了一個日式芝士蛋糕做明天的早餐，今次成功喇，新鮮出爐香噴噴，第二朝mic返熱時仍然非常軟滑，yeah!

另一種滿足

學生甲於比賽中得獎，甲媽高興得馬上致電給我報喜，得知消息後我開心得大叫起來。

學生甲年紀輕輕彈得一手好琴，首次參賽便得獎而回，怎能叫我不興奮得大叫? 定下神來，我馬上為這小朋友感恩，他曾想過放棄，但後來經鼓勵後又越彈越好，狀態大勇，考試分數一次比一次高，今天實在慶幸他當天沒有真的放棄。

功勞絕對歸於他自己及他的父母，對學生甲來說，今次奪標是對他的鼓勵和肯定，對老師而言，是一種用言語也說不出的安慰和滿足。

Fusion晚餐

今晚我弄了一個Fusion晚餐，有滷水牛筋、金菇、Kimchi和意粉。

以上食物有何關係呢? 就好似跑車配香檳和美女一樣，其實無乜關係。
以上的配搭好吃嗎?

你話呢?

說穿了，還不是為了清理雪櫃而已。

幾時先打完?

今晚Canucks對Dallas，打到第四輪加時仲未打完。睇到呢度無理由唔睇落去，家陣半夜十二點半，仲係4比4，食過水餃消夜，無野好做，同老公佈陣一人一部laptop，佢有佢整野，我有我寫blog...

左眼昅實部電視，右眼望住laptop，開始發覺寫blog寫到詞不達意。究竟幾時先打完? 應該唔會係playoff history最長的一場吧?!

自創歌詞

昨晚臨睡時本已十分疲累，經聖靈催逼下，還是的起心肝去靈修。

忽發奇才，一邊打開聖經，一邊用奇異恩典的tune唱以下自創的歌詞:
我要靈修，想有領受。我要靈修，靈修!
我要靈修，想有領受。我要靈修、領受!

正在我專心靈修時，身旁有人喃喃自語的唱:
我要靈修，我要零售。唔要批發，要零售!
我要零售，唔要批發。我要靈修、零售!

邊個話無音樂恩賜的人唔識創作? 以上就是最佳証明。

拒收學生

一個人點樣洗錢，可以大概知道佢係一個點樣既人。

母親是一名侍應，賺錢不多，時薪才不過十元八塊，上午辛苦工作了四、五小時，下午帶同小朋友來學琴，上一小時的課，當天的收入一下子進貢了入琴老師的口袋，她卻覺得非常值得，看著兒子彈琴，她滿足地笑了。

母親衣著時髦，典型事業女性，所賺的金錢應不是僅夠餬口，她卻是機關算盡，即使自己手拿LV，也毫不客氣在兒子面前與人議價討便宜。我帶兒子來學琴，花得上五十大元，你就要幫我babysit佢，最好同時幫佢補習中英數化理。阿太，煮埋飯俾佢食好唔好?

慶幸客源穩定，且大部份客也是有學識教養，有本錢可以拒收一些學生。拒收學生，不是因為學生無天份，而是因為學生有個無理的母親。

失策

新鮮出爐的蛋糕，未及影返張靚相就比老公切了一大part食到停唔到口，到我轉頭想拯救蛋糕時佢已經慘被破相。唉，失策!

這又何妨呢?

早陣了無啦啦被一長輩xyz，原因是大家合作時他不認同我用大路的方法A而要我用他的方法B。方法A與B對我來說其實無乜所謂，但我後來發現原來他自己一路亦用方法A。既然大家都用方法A，那麼他為甚麼要我用方法B呢? 覺得無厘頭之餘，又覺得佢好好笑。

根據過往經驗得知此人一向恃老賣老，也就算吧。哈! 反而是旁觀者清，我雖沒提及此事，但比他資歷、輩份更高的高人一早看在眼內，幾位高人也知此人愛起事端，所以替我不值及鼓勵我別氣餒。

還是牧師講得妙: 這又何妨呢? 他所作的，他根本不曉得，還有更重要的事要做呢! 這些關乎面子的事，到主再來時顯得多麼的微不足道，還是做好自己份內事，忠心向主交帳! 今次的小風波，就當是訓練EQ的好機會吧!

Tiramisu 我來也!

最近迷上半夜三更襯老公出外踢波時炮製甜品，今期重點推介係Tiramisu。首次弄此甜品先知原來內裡的芝士應讀Mas-car-pon-ne，而不是Mas-car-pone，難怪售貨員聽唔明我講乜，真係大鄉里!

因為首次炮製這道甜品，不敢一次過大量投資，所以份量比recipe cut了一半，無買Espresso而用了朋友從Florida帶來的手信French Vanilla咖啡，味道不是太濃，但texture則剛剛好，非常有口感。

昨晚爸媽上我家吃飯，試完味後媽媽以為Tiramisu是外買回來，而一向不愛吃西式甜品 (尤其內有芝士)的爸爸亦大讚好味，真開心!

經過首輪白老鼠實驗後，我決定先改良一下個賣相，下次整多一些請大家食!