SaSa沙龍

同SaSa玩，會見到佢好多攪笑樣。

SaSa: 我用headphone聽緊Canucks

Sa叔: 聽乜鬼，你都無插落部收音機度!

Sa叔: 你睇下SaSa個肚腩仔幾大...

SaSa: 傷風抹下鼻水先!

SaSa: 嬸嬸，你做乜咁樣?
Sa嬸: 無計，鬼叫你唔望鏡頭!

SaSa: 我呢個pose得唔得?

SaSa: 想偷影我? 無咁易!

SaSa: 我睇緊電視，唔好嘈...

SaSa: 我要讀書!

SaSa: 點解我個頭要夾髮夾?

SaSa: 白裡透紅的皮膚，你地望塵莫及啦!

韓風 (II)

另一新產品我地試係呢款Soba麵，個湯底唔係湯粉包，係真係一盒frozen湯!

個麵非常好食，唔似有D Soba麵內D buckwheat有種粗糙感，個湯有濃濃的昆布味，正呀!

韓風

近排愛上食韓餐，成日出街食都唔係方法，於是想試下自己煮。聽講Coquitlam有間好大間的韓式超市，於是走去見職見職，順便買我至愛的韓式豆腐煲的湯底。

從未試過連續同幾個售貨員解釋自己想要乜但無一人明白，D售貨員個個只識聽好簡單的英文單字，雞同鴨講之下，用盡手語再加外援(call老公即時上網查拼音)，前後於超市內行成半個鐘，好不容易先找到想買的豆腐煲湯底。

老公亦有晚同我去Robson街另一韓式超市explore下，呢間同Coquitlam果間差一點，少D貨，D貨亦唔係全韓日，有Tropicana，有Wonder Bread，仲有李錦記。兩個唔識睇日文同韓文既人，靠睇圖片同想像力，結果掃了好多都唔知係乜東東的貨品，返屋企膽粗粗逐樣試煮，過程新奇剌激又攪笑，幾好玩。

呢樣貌似麵的東西，勁難煮得軟身，前後加水超過四次，湯麵變成糊狀，口感依舊chewy，味道其實不錯，有D似年糕質地，趙到牙都軟，無理由煮45mins都未熟卦? 我地conclusion係其實質地就係咁! 老公把一些留起作明天pack lunch，結果佢要落公司canteen買lunch，according to 老公的description係因為D left over 變了一舊混凝土!!!!! mic 極都mic 唔返軟身，用膠叉食，舊混凝土把膠叉也弄斷了...

司琴炒譜

說的不是酒樓的干炒牛河，也不是工作的鼓椒炒尤，而是事奉的司琴炒譜。

右手揭頁時錯手揭多了一頁，馬上揭回時左手彈錯了拍子，炒了半個小節。半個小節其實只有拍半，大概有半秒至一秒的時間，由於正在彈過門，炒得特別礙眼。過了那個小節，一切回復正常，但司琴的心不住的往下沉。作了司琴超過十年，今次竟犯了這種不該犯的錯誤，真抵打!

炒得雖然不是十分厲害，但司琴聽到了，指揮聽到了，神聽到了。

理智上雖然知道神仍會悅納是次的事奉，但司琴仍然悶悶不樂，感覺好像一個大學生連一加一也計錯一樣。求父叫司琴不要灰心，繼續努力用心事奉。

中日式甜品

今次試的是中式甜品沙翁，新鮮整好時非常香口鬆軟，本打算留起一些給父母品嘗，可是到了第二天時沙翁變得一團又濕又軟的"麵團"，爸媽食極都想像唔到係沙翁，真失敗呢! 甜品表妹話可能係沙翁上面的糖吸了空氣內的水份，因此變得濕軟。(佢果然係甜品專家!)


於是放棄中式，改攻日式，整了一個日式芝士蛋糕做明天的早餐，今次成功喇，新鮮出爐香噴噴，第二朝mic返熱時仍然非常軟滑，yeah!

另一種滿足

學生甲於比賽中得獎，甲媽高興得馬上致電給我報喜，得知消息後我開心得大叫起來。

學生甲年紀輕輕彈得一手好琴，首次參賽便得獎而回，怎能叫我不興奮得大叫? 定下神來，我馬上為這小朋友感恩，他曾想過放棄，但後來經鼓勵後又越彈越好，狀態大勇，考試分數一次比一次高，今天實在慶幸他當天沒有真的放棄。

功勞絕對歸於他自己及他的父母，對學生甲來說，今次奪標是對他的鼓勵和肯定，對老師而言，是一種用言語也說不出的安慰和滿足。

Fusion晚餐

今晚我弄了一個Fusion晚餐，有滷水牛筋、金菇、Kimchi和意粉。

以上食物有何關係呢? 就好似跑車配香檳和美女一樣，其實無乜關係。
以上的配搭好吃嗎?

你話呢?

說穿了，還不是為了清理雪櫃而已。

幾時先打完?

今晚Canucks對Dallas，打到第四輪加時仲未打完。睇到呢度無理由唔睇落去，家陣半夜十二點半，仲係4比4，食過水餃消夜，無野好做，同老公佈陣一人一部laptop，佢有佢整野，我有我寫blog...

左眼昅實部電視，右眼望住laptop，開始發覺寫blog寫到詞不達意。究竟幾時先打完? 應該唔會係playoff history最長的一場吧?!

自創歌詞

昨晚臨睡時本已十分疲累，經聖靈催逼下，還是的起心肝去靈修。

忽發奇才，一邊打開聖經，一邊用奇異恩典的tune唱以下自創的歌詞:
我要靈修，想有領受。我要靈修，靈修!
我要靈修，想有領受。我要靈修、領受!

正在我專心靈修時，身旁有人喃喃自語的唱:
我要靈修，我要零售。唔要批發，要零售!
我要零售，唔要批發。我要靈修、零售!

邊個話無音樂恩賜的人唔識創作? 以上就是最佳証明。

拒收學生

一個人點樣洗錢，可以大概知道佢係一個點樣既人。

母親是一名侍應，賺錢不多，時薪才不過十元八塊，上午辛苦工作了四、五小時，下午帶同小朋友來學琴，上一小時的課，當天的收入一下子進貢了入琴老師的口袋，她卻覺得非常值得，看著兒子彈琴，她滿足地笑了。

母親衣著時髦，典型事業女性，所賺的金錢應不是僅夠餬口，她卻是機關算盡，即使自己手拿LV，也毫不客氣在兒子面前與人議價討便宜。我帶兒子來學琴，花得上五十大元，你就要幫我babysit佢，最好同時幫佢補習中英數化理。阿太，煮埋飯俾佢食好唔好?

慶幸客源穩定，且大部份客也是有學識教養，有本錢可以拒收一些學生。拒收學生，不是因為學生無天份，而是因為學生有個無理的母親。

失策

新鮮出爐的蛋糕，未及影返張靚相就比老公切了一大part食到停唔到口，到我轉頭想拯救蛋糕時佢已經慘被破相。唉，失策!

這又何妨呢?

早陣了無啦啦被一長輩xyz，原因是大家合作時他不認同我用大路的方法A而要我用他的方法B。方法A與B對我來說其實無乜所謂，但我後來發現原來他自己一路亦用方法A。既然大家都用方法A，那麼他為甚麼要我用方法B呢? 覺得無厘頭之餘，又覺得佢好好笑。

根據過往經驗得知此人一向恃老賣老，也就算吧。哈! 反而是旁觀者清，我雖沒提及此事，但比他資歷、輩份更高的高人一早看在眼內，幾位高人也知此人愛起事端，所以替我不值及鼓勵我別氣餒。

還是牧師講得妙: 這又何妨呢? 他所作的，他根本不曉得，還有更重要的事要做呢! 這些關乎面子的事，到主再來時顯得多麼的微不足道，還是做好自己份內事，忠心向主交帳! 今次的小風波，就當是訓練EQ的好機會吧!

Tiramisu 我來也!

最近迷上半夜三更襯老公出外踢波時炮製甜品，今期重點推介係Tiramisu。首次弄此甜品先知原來內裡的芝士應讀Mas-car-pon-ne，而不是Mas-car-pone，難怪售貨員聽唔明我講乜，真係大鄉里!

因為首次炮製這道甜品，不敢一次過大量投資，所以份量比recipe cut了一半，無買Espresso而用了朋友從Florida帶來的手信French Vanilla咖啡，味道不是太濃，但texture則剛剛好，非常有口感。

昨晚爸媽上我家吃飯，試完味後媽媽以為Tiramisu是外買回來，而一向不愛吃西式甜品 (尤其內有芝士)的爸爸亦大讚好味，真開心!

經過首輪白老鼠實驗後，我決定先改良一下個賣相，下次整多一些請大家食!

春天來了

十分喜愛溫哥華的春天，有雨水、有微風、有藍天，仲有我至愛的櫻花 :)

美女廚房 - II

上回題及美女廚房弄了焗西米布甸與梳乎厘，之後亦再有日式芝士蛋糕的誕生...

不知是否整開有條路，現在我自己有時亦會半夜三更整甜品，先後有薑汁撞奶、心太軟、朱古力蛋糕、梳乎厘改良版...

美女廚房不單止弄甜品，上次好友詩敏還煮了冬菇炆肉排給我們呢，非常美味，多謝你呀!

風雨過後

奶奶上星期已出院回家休養，再次多謝大家的代禱與問候。

最關鍵的時刻已過，體力透支過後的後遺症現在才湧現，老公與我晚晚倒頭便大睡，睡醒後卻又依然非常疲累，身心靈確實感到乏力。由奶奶出事到現在才不過三個星期，但我感覺好像已過了三個月一般。過去幾星期家務陷於癱瘓，hamper 堆滿污衣，一團團的白塵在屋內任意漂浮，雜物信件處處，新鮮水果欠奉...早幾天終於的起心肝晨早起身做家務，做完後間屋終於回復舊貌，但整個人像散了一樣，感覺係: 想死。

奶奶患病期間，老公與我經常前往陪伴及探望，但亦不想因此而忽略了爸爸媽媽，所以百忙中我們仍會抽空與他們用膳。爸媽家中需要維修，爸爸的血壓又比以前高，過幾天亦要陪他往見牙醫，還有家姐姐夫舊居的雜項事宜，只是這些生活細節加起來，亦教我與老公喘不過氣來。

昨天好友致電來，談及她家中四位年事已高的長者之健康狀況: 爸爸 (末期癌症)、媽媽(高血壓)、老爺(眼疾)、奶奶(糖尿病)。她一方面要工作謮書、照願兩名年幼的子女，又要按各長者的健康狀況預備不同飯菜，更要接載父親去做化療，家中經濟狀況又不容許他們請工人，但她卻是咬緊牙關面對挑戰。聽過好友分享後我非常佩服她的鬥志與毅力，亦自覺慚愧自己這麼早便說累。

姊妹，多謝你的分享鼓勵，讓我們深呼吸一大口氣，繼續行前面的路去!

消息

不知是否當人年紀愈大的時候，愈怕收消息，有乜風吹草動已嚇餐飽。

消息有好有壞，好的有畢業、考牌、升職、加薪、結婚、病愈、生仔...
壞的有畢唔到業、考唔到牌、失業、分手、患病、親人離世...
而第一手收消息者，反應有二: 前者勁開心，後者勁難接受事實。

一星期內收到許多第一手好與壞的消息，身體荷爾蒙一時不知所措，久違了的暗瘡正悄悄起革命。

第一手消息得知奶奶患癌，勁難接受事實。
第一手消息得知奶奶即將動手術，勁擔心。
第一手消息得知奶奶的手術的危險性及可能長達四小時，勁勁勁擔心。
第一手消息得知奶奶手術只用上兩小時且非常成功，勁開心。
第一手消息得知奶奶可以再次進食，勁勁勁開心。

不知是否心理因素作怪，每次主診醫生見奶奶時，心裡總猜度他今天帶一些甚麼消息來。我寧願從其他人口中得知奶奶病情的消息，做第一手收消息者，實在太剌激。

拉麵

從來也非常愛吃湯麵，尤其是日式湯拉麵。

離開醫院時已是下午二時，看看錶還有少許時間便要上課，想起自己原來還未吃午飯，於是走進離家不遠的 Jap Noodle Cafe吃碗拉麵。

小小的Cafe仔，別緻裝修欠奉，有的卻是親切感。有CNN新聞睇，有Jazz音樂聽，有各款足料拉麵可供選擇。偶而總愛一個人吃碗湯麵，靜靜的享受著那份簡單的寧靜與詳和，味蕾肚腹得到滿足的同時，整個人也得以放鬆下來。

喝過熱呼呼的豬骨濃湯，不再怕迎面而來的冷風，抖擻精神繼續迎接前面的挑戰。

手術後 (I)

多謝大家關心，奶奶做了手術後精神不錯，現正等報告出結果，她仍在醫院留院觀察，請大家繼續代禱!

三月七日

老公今年的生日非常特別，因為佢整日都留在醫院陪伴剛做完手術的奶奶。其實早幾個月前佢已買了飛睇hockey作為慶祝生日的主打項目，佢仲買埋佢老婆張飛，但佢老婆得知後反應係:

Huh? 你要我陪你去睇Cancucks?
唔係嘛? 咁大整蠱?
我上次叫你陪我去睇Nutcrackers，唔駛咁樣報復卦?
唉! 無計啦，鬼叫係你生日...

起初也擔心奶奶病情而一度打算唔睇hockey，最後奶奶情況好穩定，反而係佢猛叫我地去睇。首次去GM Place現場睇Cancucks，感覺係勁正，經老公密集式講解比賽規例後，覺得個比賽好吸引，好想再睇另一場。
一路行去取車途中，一路鬧老公咁遲先帶我去睇現場見識見識。